Жүкембаев пен Құсайынов келесі жекпе-жектерін Нью-Йоркте өткізетін болды

Боксшыларымыз Давида Лемье мен Кертис Стивенс арасында өтетін бокс кешінде шаршы алаңға шығуы мүмкін.

Кәсіпқой бокста бақтарын сынап жүрген отандастарымыз Батыр Жүкембаев пен Абылайхан Құсайынов Геннадий Головкиннің бұрынғы қарсыластары Давида Лемье мен Кертис Стивенс арасында өтетін бокс кешінде шаршы алаңға шығуы мүмкін, деп хабарлайды Vesti.kz.

- Менеджеріміз Анна Рева біздің бұл бокс кешінде жұдырықтасуымыз туралы қазіргі уақытта келіссөз жүргізіп жатыр, - дейді Құсайынов Vesti.kz тілшісіне берген сұхбатында. 

- Егер келісімге келсеңіздер, бұл сіздердің АҚШ жеріндегі бірінші жекпе-жектеріңіз болады. Қобалжып жатқан жоқсыздар ма?

- Бұл бокс кешінде бір ғана орын бар екен. Яғни, не мен, не Батыр жұдырықтасу керек. Қазірше кімнің жұдырықтасатыны белгісіз болып тұр. Бірақ осы бокс кешінің аясында біреуіміз шаршы алаңға шығамыз деп үміттеніп отырмыз. Қайсысымыз жұдырықтассақ та, жақсы бокс көрсетуге тырысамыз. 

Айта кетейік, қазіргі уақытта Батыр Жүкембаев та, Абылайхан Құсайынов та жекпе-жектерін Канада жерінде өткізіп жатыр. Бірінші орта салмақта өнер көрсететін 25 жастағы Жүкембаев кәсіпқой бокста осы уақытқа дейін сегіз кездесу өткізіп, жетеуін уақытынан бұрын аяқтады. Ал Құсайынов болса бес кездесу өткізіп, оның төртеуінде қарсыластарын нокаутқа түсірді. 

Еске сала кетейік, канадалық Давид Лемье мен америкалық Кертис Стивенс арасындағы жекпе-жек 11 наурық күні, Нью-Йорк қаласында өтеді. 







  0