Дычко Ковалевтің командасымен келісім-шарт жасауы мүмкін

Иван Дычко Main Events промоутерлік компаниямен келісім-шарт жасауы мүмкін.

Аса ауыр салмақта өнер көрсететін қазақстандық боксшы Иван Дычко Челябинскіде Сергей Ковалевпен кездесіп, жуық арада ресейлік боксшының командасымен келісім-шарт жасауы мүмкін, деп жазады Vesti.kz.

Жартылай ауыр салмақтағы әлемнің бұрынғы чемпионы Ковалев бүгінде Эгис Климас басқаратын Main Events промоутерлік компаниясымен жұмыс істейді.

Ал,бұған дейін аталған промоутерлік компаниямен Мадияр Әшкеев, Мейірім Нұрсұлтанов және Асхат Уалиханов секілді саңлақтарымыз шартнама жасаған болатын. Бұл боксшылардың барлығы да бұрын Иван Дычкомен бірге елордалық "Астана арландары" клубының сапында бірге өнер көрсеткен. Сондықтан да бұл жігіттердің қатарына жуық арада Иван Дычконың да қосылуы ықтимал. 

26 жастағы Иван Дычко әуесқойлар арасындағы турнирлерде аса ауыр салмақта өнер көрсетеді. Main Events промоутерлік компаниясының қатарында бұл салмақта қазір екі боксшы бар. Олар - украиналық Вячеслав Глазков (21-1-1) пен канадалық Александр Тесленко (8-0-0).

Бұл компаниядан бөлек, Дычко тікелей Ковалевтің өзімен жұмыс істеуі де мүмкін. Себебі, Сергейдің де қазір өз промоутерлік компаниясы бар. 

Еске салайық, аса ауыр салмақтағы отандасымыз екі мәрте Олимпиада ойындарының жүлдегері атанған. Бразилияда өткен төрт жылдықтың басты додасынан кейін ол бағын кәсіпқой бокстан сынап көрсем деп мәлімдеме жасаған болатын. 


Тег:



  0