Александр Бородюктің жұмысына көңілім толмайды - Сейілдә Байшақов

ҚФФ президенті Ұлттық құраманың өнеріне баға берді.

Қазақстан футбол федерациясының басшысы Сейілдә Байшақов Астанада өтіп жатқан федерацияның 15-ші есеп беру Конференциясында Ұлттық құраманың бапкерлер қосынына баға берді, деп хабарлайды Vesti.kz порталы. 

"Қазақстан құрамасының бапкерлер қосыны құрамаға жас футболшыларды көптеп шақырып жатыр. Қазіргі уақытта Еркебұлан Тұңғышбаев, Роман Муртазаев және Бауыржан Тұрысбек секілді жас футболшылар ойнап жүр. Өздеріңізде көрдіңіздер, Тұрысбек соңғы екі ойында екі гол соғып, бапкердің сенімін ақтады. Бұл дегеніміз - Қазақстан құрамасының болашағы бар деген сөз. Бірақ жалпы Қазақстан құрамасының бапкерлер қосынының жұмысына көңілім толмайды", - дейді Байшақов. 

Еске салайық, Қазақстан құрамасы әлем біріншілігінің іріктеу турнирі барысында бір де бір рет жеңіске жетпей, "Е" тобында соңғы орын алды. Александр Бородюк баптайтын біздің құраманың еншсінде 10 ойыннан кейін 3 ғана ұпай бар. 




  0