Игуаин Чемпиондар лигасы тарихында ең жылдам дубль жасады

Футболдан Чемпиондар лигасы тарихында ең жылдам дубль жасаған ойыншылар рекорды жаңарды.

Футболдан Чемпиондар лигасы тарихында ең жылдам дубль жасаған ойыншылар рекорды жаңарды. Түнде өткен "Ювентус" пен "Тоттенхэм" клубтары арасындағы кездесуде Гонсало Игуаин 8 минут 7 секунд ішінде 2 гол соғып (дубль жасап) үлгерді.

Туриндік клубтың аргентиналық сұрмергені ойындағы алғашқы голын 2 минутта соқты. 9 минутта пенальтиді сәтті орындап, өз рекордын орнатты. Осыған дейінгі ең жылдам дубль рекорды аргентиналық Хулио Рикардо Крус еншісінде еді. Ол 2006 жылы "Интер" сапында ойнап, Мәскеудің "Спартак" командасы қақпасына 8 минут 30 секунд ішінде 2 гол соққан еді.

Гонсало Игуаин рекорд жасаған ойында "Ювентус" пен "Тоттенхэм" 2:2 есебімен тең тарқасты. Тіпті аргентиналық шабуылшының ойында хет-трик жасауға мүмкіндігі болған. Алайда бірінші тайм аяқталар тұста футболшы пенальти тебуде қателесті. Ағылшындық клуб сапында Харри Кейн мен Кристиан Эриксен гол соқты.



Қос команда арасындағы қарымта кездесу 8 наурыз күні өтеді. Екі ойын қорытындысы бойынша жеңіске жеткен команда ширек финалға шығады.

Түнде "Ювентус" пен "Тоттенхэм" командаларынан өзге "Базель" мен "Манчестер Сити" де 1/8 финалдағы алғашқы ойындарын өткізді. Ағылшындық ұжым сырт алаңда қарсыластарын 4:0 есебімен ұтып, ширек финалға шығуға жақындай түсті. Ойында Илкай Гюндаган – 2 гол, Серхио Агуэро мен Бернарду Силва бір-бір голдан соқты. Қарымта кездесу 8 наурызда өтеді.



Бүгін түнде Чемпиондар лигасы 1/8 финалындағы тағы екі ойын өтеді. "Порту" (Португалия) өз алаңында "Ливерпульмен" (Англия), ПСЖ Мадридте "Реалмен" ойнайды.


  0