"Ордабасы" футбол клубы ОАР ойыншысын өз сапына қосты

ҚПЛ тарихында ол ОАР-дан келген бірінші легионер болып жазылады.

Болгариялық "Лудогорец" клубы ресми сайтында ОАР-лық жартылай қорғаушы Мэй Малангудың "Ордабасыға" ауысатыны туралы хабарлады. 

Кеше, 14 ақпанда, екі клубтың басшылығы құжаттарға қол қойды. Осылайша Малангу 2019 жылды толықтай шымкенттік команда сапында өнер көрсететін болады. Жалға беру мерзімі аяқталғаннан соң, "Ордабасы" африкалық футболшыны трансфер кезінде сатып алуға мүмкіндік алады. 

29 жастағы Малангу "Лудогорец" командасына 2018 жылы келген - клуб оны румындық "Динамо" командасынан 500 мың еуроға сатып алған. Болгария чемпионатында ол төрт ойын өткізіп, бір гол салды. Сондай-ақ, екі ойында Еуропа лигасының топтық кезеңінде өнер көрсетті. "Лудогорецпен" оның келісімшарты 2021 жылдың маусым айына дейін жасалған. 

Бұрындары Малангу бельгиялық "Сент-Труйден", түркиялық "Коньяспор", швециялық "Гетеборг" және "Хельсинборг" клубтарының намысын қорғады. Спорттық мансабын өз елінде "Александра Юнайтед" командасында бастаған. 

ОАР құрамасы үшін 2012 жылдан бастап өнер көрсетіп келеді және осы күнге дейін 19 ойын өткізіп, 2 гол салған. 

ҚПЛ тарихында ол ОАР-дан келген бірінші легионер болып жазылады. 


  0