Бруно Соарес "Заря" сапына неге ауыспады?



Луганскілік "Заря" клубының директоры Сергей Рафаилов "Қайраттың" орталық қорғаушысы бразилиялық Бруно Соаресті не үшін командада алып қалмағанын түсіндірді. 

Еске салайық, бұған дейін бойшаң бразилиялық қорғаушы "Заря" сапына барып, оқу-жаттығу жиындарынан өткені белгілі болған еді. Бірақ Луганск қаласының командасында ол ұзақ қала алмады. 

"Бізге расында "Қайрат" сапынан бразилиялық Бруно Соарес деген футболшы келді. Содан кейін біз ол туралы ақпарат жинай бастадық. Оның ауыр операция жасатқанын білдік. Бізге оны дайын, өзінің есебінен келеді, тек көрсеңіздер болды деген. Біз футболшының деңгейін бақыладық. Бірақ ол мүлде дайын болмай шықты. Сол себепті де біз онымен келісімшарт жасамадық", - дейді Рафаилов "Заря" клубының сайтындағы конференцияда. 

"Заряда" бақылаудан өте алмаған қорғаушы қазір Қазақстаннан жаңа команда тауып алды. Бұл футболшы бүгінде шымкенттік "Ордабасы" клубының қатарында жаттығып жүр. Негізі шымкенттік клуб бұл позицияға бірнеше футболшыны үміткер ретінде қарастырған. Аяғындау таңдау Соареске түсіпті. Енді "Ордабасы" алдағы уақытта онымен келісімшарт жасайын деп отыр. 

Еске салайық, Соарес Қазақстан біріншілігіне 2015 жылы ауысып келген еді. Соңғы екі жылды қорғаушы алматылық "Қайраттың" сапында өткізіп, ішкі біріншілікте 17 кездесуде 2 гол соқты. Одан кейін ауыр жарақат алып қалып, командасына ұзақ уақыт көмектесе алмады. 






  0