Сергей Хижниченко Беларусь клубына ауысты

Шабуылшы солигорскінің "Шахтерімен" келісімшарт жасады.

Беларусь біріншілігінде өнер көрсететін солигорскінің "Шахтер" өзінің ресми сайтында қазақстандық шабуылшы Сергей Хижниченконың ауысқаны туралы хабар таратты. 

""Шахтер" - Беларусь біріншілігінде өнер көрсететін мықты клубтардың бірі. Команда үнемі үздік үштіктің қатарынан көрініп жүр. Клубтың алға қойған мақсаттары да биік. Маған осындай биік мақсат қоятын клубтар ұнайды. Сондықтан да "Шахтер" басшылары ұсыныс жасаған кезде, мен бірден келісімімді бердім", - дейді Хижниченко "Шахтер" клубының ресми сайтына берген сұхбатында. 

Айта кетейік, 25 жастағы футболшы өткен маусымды қостанайлық "Тобыл" сапында өткізген еді. Ол ел біріншілігінде 28 кездесуге қатысып, 10 гол соқты. 

Бұған дейін шабуылшы Қазақстан біріншілігінде "Астана", "Атырау" және қарағандылық "Шахтер" сапында ойнаса, Польша біріншілігінде "Корона" сапында өнер көрсеткен еді. 





  0