Трилогия алдында басын даудан арашалап алды. "Канелоның" бір жылдық допинг-тестінің қорытындысы жарияланды

2018 жылы GGG-мен қарымта алдында мексикалық допингпен ұсталған.

Допингке ерікті тестілеу қауымдастығы (VADA) орта салмақта WBC, WBA (Super) және IBF чемпионы мексикалық Сауль "Канело" Альварестің (52-1-2, 34 КО) бір жылдық сынамасын жариялады.

Альварес VADA мен WBC (Бүкіләлемдік бокс кеңесі) ұйымдастырған "Таза бокс" бағдарламасы аясында допинг-тесттен өтіп жүрді.

"Канелоны" VADA-ның жылдық ерікті допинг-тестілеу бағдарламасын оңтайлы аяқтаумен құттықтаймыз", - делінген ұйым хабарламасында.

Еске салайық, Альварес қазақстандық Геннадий Головкинмен (38-1-1, 34 КО) қарымта жекпе-жегі алдында допинг дауына іліккен. Боксшылар Лас-Вегастағы T-Mobile аренасында екі рет жұдырықтасты: 2017 жылы қыркүйекте төрешілер шешімімен тең түсті, ал келесі жылы мексикалық жеңіске жетті. 

Бастапқыда боксшылар екінші рет мамырда жұдырықтасу керек болатын, алайда, "Канелоның" ақпанда өткізген сынамасынан кленбутерол табылған еді. Осыдан кейін мексикалық алты айға бокстан шеттеліп, қарымта алты айға шегерілді. 


  0